သိုင်းလောကသားတွေ ဝင်ငွေဘယ်ကရ

၁။ သိုင်းစာအုပ်အများစုဟာ ဒီမေးခွန်းအတွက် လုံလောက်တဲ့ အဖြေမရှိကြပါဘူး။ သိုင်းလောကသားတွေရဲ့ ကြိုးစားရုန်းကန်မှု၊ အနစ်နာခံမှု၊ စွန့်လွှတ်စွန့်စားမှု၊ ကောက်ကျစ်ယုတ်မာမှု စတာတွေကို အလေးပေးဖော်ပြကြပေမယ့် ဝင်ငွေရှာဖွေမှု အပိုင်းကိုတော့ လျစ်လျူရှုထားခဲ့ကြပါတယ်။ စာအုပ် ၁၀ အုပ်မှာ ၉ အုပ်လောက်က အဲဒီကိစ္စကို ထည့်သွင်းရေးဖွဲ့ထားခြင်း မရှိပါဘူး။

၂။ သိုင်းစာအုပ် အချို့မှာတော့ ဒီမေးခွန်းအတွက် အဖြေရှိပါတယ်။ တိုက်ရိုက် (သို့မဟုတ်) သွယ်ဝိုက်တဲ့ နည်းလမ်းနဲ့ ဒီမေးခွန်းရဲ့အဖြေကို ဇာတ်လမ်းတွေထဲမှာ ထည့်သွင်းရေးဖွဲ့ထားပါတယ်။

ဒီနေရာမှာ သိုင်းလောကသားတွေရဲ့ စားဝတ်နေရေး ဖြေရှင်းမှုကို ၂ မျိုး ထပ်ပြီး ခွဲခြားပြောရမှာဖြစ်ပါတယ်။ အဲဒါကတော့

(က) ဂိုဏ်းအလိုက် စားဝတ်နေရေးဖြေရှင်းမှု

(ခ) တစ်ဦးချင်း စားဝတ်နေရေးဖြေရှင်းမှု

၁။ ကိုယ်ထူကိုယ်ထစနစ်

အဖြူရောင်ဂိုဏ်းတွေဟာ စားဝတ်နေရေးကို ဂိုဏ်းတွင်း အရင်းအမြစ်တွေ၊ ဂိုဏ်းသားတွေရဲ့ ပါဝင် ပံ့ပိုးမှုတွေနဲ့ ဖြေရှင်းကြပါတယ်။

၂။ အစိုးရထောက်ပံ့မှု

ဂိုဏ်းတချို့၊ အထူးသဖြင့် ဘာသာရေးဆိုင်ရာ ဂိုဏ်းတွေဟာ ဘုရင်တွေ၊ နယ်စားတွေရဲ့ အသိအမှတ်ပြုမှုကိုရတဲ့အတွက် ထောက်ပံ့လှူဒါန်းမှုတွေ ရကြပါတယ်။

၃။ စီးပွားရေးလုပ်ငန်းများ

ဂိုဏ်း (သို့မဟုတ်) ဂိုဏ်းခေါင်းဆောင် အများအပြားဟာ အာမခံလုပ်ငန်း၊ ငွေလွှဲစာတိုက်လုပ်ငန်း၊ အပေါင်ဆိုင်လုပ်ငန်း တို့လို သိုင်းလောကနဲ့ စပ်ဆက်တဲ့ စီးပွားရေးလုပ်ငန်းတွေကိုလည်း တစ်ဖက်တစ်လမ်းက ပြုလုပ်ကြပါတယ်။ အဲဒီလိုပဲ ဂိုဏ်းအသီးသီးရဲ့ လွှမ်းမိုးရာနယ်မြေမှာရှိတဲ့ ဒေသခံ စီးပွားရေးသမားတွေဆီကလည်း ထောက်ပံ့မှု ရကြပါတယ်။ ဒါပေမဲ့ ထိပ်သီးဂိုဏ်းကြီးတွေကတော့ ကိုယ်တိုင်ကိုယ်ကျ စီးပွားရေးလုပ်တာ မတွေ့ရပါဘူး။

ပထမတန်းအဆင့်မဟုတ်တဲ့ ဒုတိယတန်းစားနဲ့ တတိယတန်းစား ဂိုဏ်းတွေ၊ အဖွဲ့အစည်းတွေကတော့ သိုင်းသင်တန်းကျောင်းဖွင့်တာ၊ အာမခံဌာနဖွင့်တာ၊ အလုပ်လက်ခံတာမျိုးနဲ့ အဓိက ငွေကြေးရှာဖွေလေ့ ရှိကြပါတယ်။ ဥပမာတချို့ ပြောပြပါ့မယ်။ 

၄။ မျိုးရိုးကြွယ်ဝမှု

တချို့သော အဖွဲ့အစည်းတွေဟာ မျိုးရိုးအလိုက် ပင်ကိုယ်ကြွယ်ဝချမ်းသာတာကြောင့် သိုင်းလောကထဲ ကျင်လည်ကျက်စားရာမှာ လိုအပ်တဲ့ အသုံးစရိတ် ငွေကြေးအတွက် တခြားသူကို မှီခိုအားကိုးစရာ မလိုပါဘူး။

စုံထောက်ဆန်ဆန် သွားလာလှုပ်ရှားတတ်တဲ့ လုရှောင်ဖုန့်၊ ဆင့်ဆင့်အိ၊ လုံဆင်ပိ၊ ချူလျူရှမ်း၊ ရှောင်မား စတဲ့ သိုင်းလောကသားတွေရဲ့ ရပ်တည်မှုကတော့ အလွန်ရှင်းပါတယ်။ သူတို့ဟာ သိမ်းငှက်လောက်ချစ်တို့လို အစိုးရ မှုခင်းဌာနတွေ၊ ဒါမှမဟုတ် အကူအညီတောင်းခံသူတွေဆီက လိုအပ်တဲ့ ငွေကြေးပံ့ပိုးမှုရကြပါတယ်။

အာမခံလုပ်ငန်း တည်ထောင်ထားတဲ့ သိုင်းလောကသားတွေအနေနဲ့လည်း ဝင်ငွေဘယ်ကရမလဲဆိုတာ မေးစရာမလိုလောက်အောင် ရှင်းပါတယ်။ ပြီးတော့ အဲဒါက ဂိုဏ်းတွေနဲ့ မဆိုင်ပါဘူး။ သီးခြား အသက်မွေးဝမ်းကျောင်း လုပ်ငန်းတစ်ခုပါ။ သူတို့ဟာ အာမခံလုပ်ငန်းနဲ့ အသက်မွေးဝမ်းကျောင်းပြုနေတဲ့ သိုင်းသမားတွေပါ။ သိုင်းလောက ထိပ်သီးစာရင်းဝင် ဘယ်ဂိုဏ်းကြီးကမှ ဂိုဏ်းရန်ပုံငွေအတွက် အာမခံဌာနဖွင့်တယ်လို့ အထင်အရှားမရှိပါဘူး။ ဥပမာအားဖြင့် လင်ရွယ်ထူဟာ ရှောင်လင်ကိုယ်တော်ဟောင်းဖြစ်ပေမယ့် သူ့ရဲ့ မင်္ဂလာအာမခံဌာနကတော့ ရှောင်လင်ဂိုဏ်းနဲ့ မသက်ဆိုင်ပါဘူး။ [တပည့်ဟောင်းအနေနဲ့ အလှူငွေတော့ ထည့်ချင် ထည့်ပေမပေါ့]

ကြေးစားလူသတ်အဖွဲ့တွေ၊ ကြေးစားလူသတ်သမားတွေဟာလည်း ထို့အတူပါပဲ။ သူတို့ရဲ့ ဝင်ငွေရလမ်းကတော့ ပြောပြစရာမလိုလောက်အောင် ရှင်းလင်းပါတယ်။

တချို့သော အဖြူရောင် သိုင်းလောကသားတွေကတော့ ဘဝပေး အခြေအနေအရ အာမခံဌာနတွေမှာ ဝင်လုပ်တာ၊ မြို့စားတွေဆီမှာ သင်တန်းနည်းပြလုပ်တာ၊ စားသောက်ဆိုင်မှာ လုပ်ခြုံရေးတာဝန်ခံဝင်လုပ်တာမျိုးရှိကြပါတယ်။ ဒါပေမဲ့ များသောအားဖြင့် အဲဒါက အချိန်ပိုင်းအလုပ်ပါ။ အခိုက်အတန့်ကာလတစ်ခုပဲ လုပ်ကြတာပါ။ [အမြဲလုပ်နေမယ်ဆိုရင်တော့ သူတို့ကို ဝန်ထမ်းလို့ပဲ သတ်မှတ်ရမှာပါ။ မကောင်းသူပယ် ကောင်းသူကယ် သိုင်းလောကသား စစ်စစ်မဟုတ်ပါဘူး]

သိုင်းလောကထဲ လှည့်လည်သွားလာချိန် မဟုတ်တဲ့ကာလတွေမှာ စားဝတ်နေရေး ဖြေရှင်းပုံတွေကလည်း ကျိုးကြောင်းဆီလျော်ကြတာ များပါတယ်။ သိပ်ပြီး မေးခွန်းထုတ်စရာ မရှိပါဘူး။ ဥပမာ သိုင်းပညာသင်ယူစဥ် ကာလတွေ၊ အကြောင်းတစ်ခုခုကြောင့် ဇာတ်မြှုပ်နေထိုင်စဥ် ကာလတွေကို ဆိုလိုတာပါ။

အင်္လကာသိုင်းသမားစာစဥ်မှာ ဟွာရန်ဖူးနဲ့ ဟွာယွင်ရှန်တို့ သားအဖဟာ တံငါအလုပ်လုပ်ရင်း အေးအေး ဆေးဆေး နေထိုင်ကြပါတယ်။ လျှို့ဝှက်သိုင်းကျမ်းနှင့် သိုင်းသမားတိယုံစာစဥ်မှာ တိယုံဟာ ဆရာ၊ ဆရာတူညီမတို့နဲ့အတူ လယ်ထွန်ရင်း၊ စပါးစိုက်ရင်း၊ နွားကျောင်းရင်း နေထိုင်ခဲ့ပါတယ်။ သိုင်းလုလင်နှင့် သွေးစွန်းတမန်စာစဥ်မှာ လုဝေဟာ သိုင်းပညာပျက်စီးသွားပြီးနောက် ဟော်ရွှမ်းရွှမ်းနဲ့အတူ ပန်းရောင်းရင်း နေထိုင်ခဲ့ပါတယ်။ ချစ်မက်မပြေ သွေးသက်သေစာစဥ်မှာ ကျန်းပေါင်ဟာ တော်လှန်ရေးသမားအဖြစ် မလှုပ်ရှားချိန်မှာ ညီ၊ ညီမတွေနဲ့အတူ တောင်ယာလုပ်ပါတယ်။ သိုင်းသမားကျင့်ဝတ်စာစဥ်မှာ ပထမဓါး လုံဖွေးဟာ သိုင်းလောကကို ညဉ်းငွေ့သွားချိန်မှာ မြင်းလှည်းမောင်းသမားအဖြစ် အသက်မွေးပါတယ်။

တချို့သော သိုင်းစာစဥ်တွေမှာ ထင်ရှားတဲ့ အဖြူရောင်သိုင်းလောကသားတွေဟာ သူတို့ရဲ့ အရှိန်အဝါနဲ့ ကိုက်ညီတဲ့ အသုံးအစွဲတွေ၊ ဧည့်ခံစရိတ်တွေကို မရှာဖွေနိုင်တဲ့အတွက် နောက်ကွယ်မှာ မကောင်းမှုတွေတိတ်တဆိတ် လုပ်ကိုင်နေရပုံကို ဖော်ပြထားပါတယ်။

နိဂုံးချုပ်ပြောရရင်တော့ သိုင်းစာစဥ်တွေမှာ သိုင်းလောကသားတွေရဲ့ ဝင်ငွေရရှိပုံ၊ စားဝတ်နေရေး ဖြေရှင်းပုံတွေကို ထည့်သွင်းဖော်ပြမှု အားနည်းပါတယ်။ ဒါပေမဲ့ တချို့သောစာစဥ်တွေမှာ ထည့်သွင်းဖော်ပြချက်တွေအရ သိုင်းဂိုဏ်းကြီးတွေ၊ သိုင်းလောကသားတွေဟာ စားဝတ်နေရေးအတွက် အထက်ပါနည်းလမ်းတွေအတိုင်း ဖြေရှင်းကြတယ်လို့ ဆိုချင်ပါတယ်။

အဖြူရောင်သိုင်းလောကကြီး အဓွန့်ရှည်တည်တံ့ပါစေ။

#သိုင်းလောကသားတွေဘယ်ကဝင်ငွေရ

#wikiwuxiathinelawka